1Cor 10 | ZomZIV | STEP | Bang hang hiam cih leh sanggamte aw, i pu i pate meiipi nuai-ah omin amaute khempeuh tuipi sung tawna a paisuakna thu na theih loh ding uh ka deih kei hi.

1 Corinthians 10

Israel-te Tangthu pan Vauhilhna

1 Bang hang hiam cih leh sanggamte aw, i pu i pate meiipi nuai-ah omin amaute khempeuh tuipi sung tawna a paisuakna thu na theih loh ding uh ka deih kei hi. 2 Amaute khempeuh Moses sungah meii le tuipi-in a kibaptise uh hi. 3 Amaute khempeuh in khalam an a kibang ne uh a, 4 khalam dawn a kibang a dawn uh hi; ahang in, amaute a tonpih khalam Suangpi panin dawn uh a, tua Suangpi Christ ahi hi. 5 Ahi hangin amaute a tamzaw tungah Pasian lungkim lo a, amaute pumpi gamlakah a kithehthang hi. ^a

6 Amaute bangin a gilo nate lunggulhin i om loh nadingin eite etteh ^{▼▼10.6 Ahikeh etsakna; tg.11 ah zong} dinga hihte a tungkhol ahi hi. 7 “Tua mite a ne a dawn dingin tusuk uh a, lawkite noptatna haihuai sunga bual dingin a dingto uh hi.” ^{▼▼10.7 Pk. 32:6} ci-a kigelhsa amaute pawlkhat bangin milim biate suak kei ni. 8 Amaute pawlkhat in numei pasal paktatna a bawlna uh hangin ni khatin tul sawmnih le tulthum si uh hi - eite in tua bang mawhna bawl kei ni. 9 Amaute pawlkhat in Topa zia-et uh a, gul in a tuklup bangin eite in i Topa zia-et kei ni. 10 Amaute pawlkhat phun uh a, a thatgam thei vansawltak in amaute a thah bangin eite phun kei ni. ^d

11 Amaute tungah hih thute etteh dingin na pianga, khanghunte a bukimna hong tunna, eite kivauhilh nadingin a kigelh hi. 12 Tua ahi ciangin kiptakin dinga na kingaihsut leh na puk loh nadingin kidawm in! 13 Note in mihingte tuah ngei zia-etna longal na tuak kei uh hi. Pasian a muanhuai hi; na thuak zawh loh ding zahval zia-etna hong tungsak kei ding hi. Ahi hangin note hong kizia-et ciangin na thuakzawh nadingun suahtakna lampi hong bawlsak ding hi. ^e

Milim Pawite le Topa Nitak-an

14 Tua ahi manin ka lawm itte aw, milim biakna na taisan un. 15 Thu ngaihsun thei mite kianga thugen ka hi hi. Ka thugente nomau mahmah adingin na khentel un. 16 Eite in lungdam i koh tua lungdamkohna hai in, Christ sisan a i kihelna hi lo ahi hiam? Eite in i balkhap anlum zong Christ pumpi-a i kihelna mah hi lo ahi hiam? 17 Bang hang hiam cih leh anlum khat om a, lum khat panin ne tek i hi manin a tampi eite pum khat i hi hi. ^f

18 Israel mite ngaihsun dih un: kithoihna sa a nete in biaknatau ah kihelna nei uh hi lo ahi hiam? 19 Tua ahileh milim tunga kipia kithoihna na khatpeuh ahi zongin, milim ahi zongin thupi hi, ka cihnopna ahi hiam? 20 Hilo hi. Ahi hangin lawkite kithoihna pen dawite tungah thoihna-a kipia hi-a, Pasian tunga kipia ahi kei hi. Tua hi-a dawite tawh na kikop khawm ding uh ka deih kei hi. 21 Topa hai dawnin dawite hai zong na dawn khawm thei kei ding uh hi. Topa sabuai le dawite sabuai ah a nihin na umkhawm thei kei ding uh hi. 22 Eite in Topa hazatna sosak dingin hanciam i hi hiam? Eite amah sangin thahat zaw i hi hiam?

Thu-umte Suahtakna

23 Na khempeuh hih ding a kiphal hi. Ahi hangin na khempeuh phattuamna ahi kim kei hi. Na khempeuh hih ding a kiphal hi - ahi hangin na khempeuh in a hoihsak kim kei hi. 24 Kuamah in ama hoih nading bek zong loin midangte hoih nading zong zaw hen. ^g

25 Na kitheihna lungsim dong loin sa zuakna-a kizuak sa khatpeuh na ne in. 26 Ahang in, “Leitung le a sunga om khempeuh Topa aa ahi hi.” ^{▼▼10.26 Ph. 24:1
,} ⁱ

27 Thu um lo mi khatpeuh in an ne dingin hong sapa na va hawh nop leh na kitheihna lungsim dong loin na mai-a kilui peuhpeuh ne in. 28 Ahi hangin mi khatpeuh in, “Hih in kithoihna-a kipia sa ahi hi,” hong cih leh tua hong genpa hang le na lungsim kisuantakna hangin ne kei in. ^{▼▼10.28 Khutgelh pawlkhatah theihtheihna hangin, ahangin “Leitung le a sunga om khempeuh Topa aa ahi hi”} 29 Nang aa hi lo midang lungsim kitheihna gen ka hi hi. Ahang in, bang hangin kei suahtakna, midangte lungsim kisuantakna in thu kikhen ding ahi hiam? 30 Lungdamtaka tua an ka nek leh bang hanga na khatpeuh tungtanga Pasian tung lungdam ka kohna hangin kei hong kimawhsak ahi hiam?

31 Tua ahi ciangin na ne, na dawn uh zongin na hihna peuhpeuhuah na hihna khempeuh uh Topa minthan nadingin na hih un. 32 Jew-te le Greek-te ahikeh Pasian pawlpi khat peuhpeuh ahi zongin kimuktusak kei unla, 33 lam khempeuh ah mi khempeuh lungkimsak ka sawm bangin na hih un. Bang hang hiam cih leh amaute a kihotkhiat theih nadingin keimah kia hoih nading zong loin mi tampi hoih nading ka zong hi.